في مسعى لجعل ألعاب الأطفال تمثل كل الفئات، قررت صانعة الدمى السورية صفا حمادة إطلاق مجموعة من الدمى المصنوعة من الكروشيه بملامح مشابهة للمصابين بمتلازمة داون.

لطالما وجدت صفا صعوبة في العثور على الدمى التي يمكن أن يرتبط بها الأطفال المصابون بمتلازمة داون، في متاجر الألعاب العديدة.

وقالت صفا صاحبة شركة (وي دو): “تعزيز وجود الداون بالمجتمع يعني إذا عندي ولد داون، وبدّي روح أنا وياه على محل ألعاب عم نتفرج على الألعاب كلها شكلها باربي شكل طبيعي، هو بدّه يشوف حاله غريب، فلما بدّه يفوت على محل ويشوف إنه لا في لعبة بتشبهه هو بينبسط الولد إنه أنا شكلي طبيعي لأنه هو شكل من أشكال الإنسان”.

الدمى التي تنتجتها شركة صفا مصنوعة باستخدام تقنية الكروشيه اليابانية المعروفة باسم أميجورومي، وتباع بسعر يتراوح ما بين 100 ألف و135 ألف ليرة سورية أو ما يعادل 22 إلى 30 دولاراً.

وقالت ميساء فزع، مديرة شركة ماسة دول لألعاب الأميجورومي: “العيون لوزية مختلفة عن العيون اللي نحنا منعملها. شكل الوجه كمان مدور أكتر. يعني فيه تفاصيل حتى جسدية بتختلف عنا لحتى يكون تصميمها ناجح شبههم تماما. لما تشوفي اللعبة تقولي إنه هي بتشبه متلازمة داون”.

ويتم توزيع الأرباح من المبيعات على الجمعيات الخيرية والمنظمات التي تدعم الأطفال المصابين بمتلازمة داون في جميع أنحاء البلاد.

وقالت سوسن حمود، التي تعاني ابنتها تالا من متلازمة داون، إنها سعيدة لرؤية مثل هذه دمى في متاجر الألعاب.

“بتحسس الأطفال التانيين إنه يتعرفوا عليهن يشوفوهن وما يستهجنوا ما يستغربوا بالعكس كتير فكرة حلوة. كتير عجبتني ما توقعت بصراحة يكون بهذا الجمال وبأشكال كتير حلوة. حلوة مشان الأطفال التانيين يتعرفوا عليهن”.

وأشارت صفا إلى إقبال الكثيرين على شراء هذه الدمى قائلة: “كتير صار عالم بلشت تطلب وبلشت تشتري وبصراحة العالم عندها أطفال طبيعية غير إنه فيه أطفال داون لفتتهن هدول الألعاب وصار بدن يشتروا منها، فيه أطفال طبيعيين عم يشوفوا الألعاب ويشوفوا شيء جديد”.

(رويترز)