محمد بن جمال: عيد الأم قرب وكلنا بنحب امهاتنا. امهاتنا اللي شالتنا في بطنها 9 شهور ورضعتنا سنتين.
الام اللي كانت بتأكلنا الزبادي بالعافيه وبتحطلنا الملوخيه على الرز. وبتتخانق معانا عشان نشرب اللبن. ولما كانت بتعملنا حاجه صايعه كانت بتبقي موز بلبن برضه.
اول فيلم رعب امك وريتهولك لما كانت بتعملك بصوابعه 3 أو تقرصك من فخدتك وبعديها تقولك جمله «هوريك لما نروح «.
امك اللي كانت بتزعقلك لما تشتم. وتقولك هقول لباباك لما يجي وكانت عاوزاك تبقى عفيف اللسان ومؤدب. مكنتش عاوزه تشوفك مرتضى منصور.
أمك اللي كانت بتسرحلك شعرك على جنب وتدخلك القميص جوه البنطلون وتلبسك ست بلوفرات فوق بعض عشان متبردش. فكنت بتقلب محمد هنيدي في فول الصين العظيم «يوم ورا يوم حبيبي».
أمك اللي كانت بتصحيك كل يوم عشان المدرسة وتعملك سندوتشات جبنة بيضة بالطماطم. وانت كنت بترميها عشان مترجعلهاش بيها.
أمك اللي كانت بتذاكرلك وبتسأل عليك المدرسين، وكانوا بيقولولها ابنك فاشل يا حاجه وكانت بتستحملك وبتشد عليك يمكن تفلح.
أمك اللي كانت بتصحيك الفجر ساعة الامتحان عشان تراجع. وكانت بتفضل تدعيلك من الساعه 9 للساعه 12. وتكلمك أول ماتخلص امتحان عشان تطمن عليك.
أمك اللي كان نفسها تشوفك زي مصطفى محمود أو عالم زي احمد زويل أو دكتور زي مجدي يعقوب … اينعم انت طلعت احمد التباع في الآخر. بس ده مش ذنبها هي يعني هي عملت اللي عليها.
أمك اللي دايما مش عاجبها أصحابك عشان عيال صيع. وانت بتتخانق معاها على طول وبتقولها « انتي بتقولي عليهم وحشين مع اني بقعد معاهم كل يوم !! هتعرفيهم اكتر مني ؟! مايصحش كده »
أمك اللي بتعملك كل حاجة ومش عاوزه غير انك تبقي كويس. عمرها ما قالتلك فين المورنينيج تيكست بتاعتي. ولا اتخانقت معاك فدخلت اوضتها وعملت شير لبوست عن الريليشن شيب جولز بين الابن وامه.
أمك اللي بتديك من غير مقابل … اللي نفسها تشوفك أحسن واحد في الدنيا …. اللي بتفرح بكلمة حلوة … اللي مابتقلكش هات ورد عشان عارفه انه هيترمي. وهتفرح اكتر لو جبت بتنين جنيه عيش فينو للبيت أو دخلت عليها بكرتونة بيض.
أمك اللي على طول لما بتوريها عروسة مابتعجبهاش ودايما بتنقيلك البنت البيضة المدملكه عشان تضمن مستقبلك الغذائي وتطمن على كرشك الصغير العمر كله.
أمك اللي بتدعيلك وانت نازل تشتغل … وبتقول ربنا يوسع في رزقك يابني … عشان تطلعها شرم في نص السنة.
أمك اللي بتعمل أحسن أكل في الدنيا. وفيه اكلات ماينفعش تاكلها غير من ايديها هي وبس. طبعا يستثني من الأكلات دي البيتزا والشاورما السوري عشان البيتزا بتقلب عيش وعليه زتون والشاورما السوري بتقلب حتت فراخ محمرة عليها حاجات بيضة لزجه المفروض اسمها تومية.
أمك دي ست عظيمة جدا. ربنا يحفظلنا امهاتنا ويطول في عمرهم. ويرحم كل أم ماتت ويجازيها خير عن اولادها.
شكرا يا أمي
كاتب مصري
