محمد بن جمال: وانا عندي 10 سنين كان ابويا بيحكيلي عن الحياه في وقتهم، عن المدارس على ايامه. ازاي كانت كويسه وازاي كان بيفهم من المدرسين وعمره ما اخد دروس في حياته لا هو ولا اخواته. وبالرغم من كده قدر يجيب مجموع يدخله كليه الطب.
كان بيحكيلي عن المصروف اللي كان بياخده وبيجيب بيه ايه. كان بيحكيلي عن كيلو الرز اللي بـ 3 قروش وكيلو السكر اللي بـ 5 قروش وعن الغاتوه اللي كان بقرشين. ولما كان بيحب يصرف ويبهزر كان بيروح جروبي يجيب حته الغاتوه بخمس قروش «جروبي ده زي لابوار دلوقتي يعني». كان بيحكيلي عن الجزمه الجلد الطبيعي اللي جابها بـ 3 جنيه … وازاي فضلت عايشه معاه ومجرلهاش حاجه مش زي جزم اليومين دول.
كان بيحكيلي عن اول مرتب اخده من وزاره الصحة، اونه كان كل يوم في التكليف بيجيب فرخة، عشان يتغدى ويتعشا بيها والفرخة سعرها كان 50 قرش. حكالي عن المظاهره اللي حصلت في عهد السادات عشان اللحمه وكانوا بيقولوا «أنور بيه أنور بيه.. كيلو اللحمه بقى بجنيه»، وساعتها جه في بالي هل هيجي اليوم ده اللي اكلم فيه ولادي اقولهم والله انتوا ايامكم سوده والله يكون في عونكم؟
هقولهم ده انا على ايامي كنت بقعد في «ستار بكس» اخد الـ «تشيز كيك» والـ «موكا كراميل» ومابدفعش غير 100 جنيه بس؟ مش زي دلوقتي حته الـ «تشيز كيك» بقت بـ 1999 جنيه غير شامله مصاريف الشحن. هل هقولهم على ايامي كنت بجيب كيلوا اللحمه بـ 100 جنيه … والفرخه بـ 50 جنيه ؟! مش زي دلوقتي كيلو اللحمه بـ 4200 جنيه والكندوز بـ 5000. هقولهم علي ايامي كنا 80 واحد بس في الفصل، وكنا بناخد درس واحد في كل ماده مش زي دلوقتي، كل 10 صفحات في الماده ليهم مدرس.
هقولهم احنا دخلنا كليه طب ايام الرخص.. أيام مكانت طب بتاخد 98 % مش زي دلوقتي بقى لازم تجيب 100 % وشهاده من اتنين أمناء شرطة انك تضرب عادي. هقولهم على ايأمنا كانت الشقه الـ 130 متر في «اب تاون كايرو» بـ 2 مليون ونص، ايام الرخص، هيقولولي طب ماجبتش ليه. هقولهم اصلي كنت مستني العاصمه الجديده تفتح بس محصلش نصيب.
هقولهم على ايأمنا كان اللي يتعب ويروح مستشفى يبعتوه يشتري قطن و«بيتادين» وادويه طوارئ عشان المستشفى مافيهاش ادوية، لكن دلوقتي اللي بيتعب بقى بيروح القسم عشان يريحوه بدري بدري. هقولهم زمان كان بيحصل تجاوزات فردية من وزاره اسمها وزارة الداخلية، قبل ما يغيروا اسمها إلى «وزاره التجاوزات الفردية» وشعارها «تحت باطك ليس ملك لك واحدك» أو «ان اغتصبوك ولم تستطع المقاومة فحاول ان تستمتع».
هقولهم زمان الدولارالامريكي كان بـ 10 جنيه. ايام الرخص. لكن دلوقتي الدولار وصل لـ 1000 جنيه. الدولار الناميبي مش الامريكي هقولهم زمان كوبايه الشاي ع النيل في الزمالك كانت بخمسة جنيه، دلوقتي بقت بـ 3 جنيه بس. ودي الحاجه الوحيده اللي رخصت، بس عشان مابقاش فيه نيل مش عارف هقولهم ايه ولا ايه. بس اللي متأكد منه اننا في اخر ليفل من الصعوبة، وشكل مافيهاش جواز، ولا فيها عيال …فتصبحوا على خير بقى.
مدون مصري
