دير البلح – رويترز: يتيح مقهى صغير على شاطئ البحر في غزة لرواده فرصة لأخذ استراحة من العالم الرقمي وذلك من خلال توفيره كتبا ورقية للقراءة مجانا في أثناء احتسائهم مشروباتهم.
ويأمل مؤمن طومان، صاحب المقهى وفكرة «مكتبة قارئ البحر»، في أن يشجع بذلك المزيد من الناس على قراءة الكتب واستبدال الوقت الذي يقضونه في تصفح الانترنت ووسائل التواصل الاجتماعي بالاختيار من بين مجموعة صغيرة من الكتب المتوفرة في المقهى.
وقال طومان «كل الأكشاك الموجودة والكافيتريات بتقدم مشروبات ساخنة ومشروبات باردة وسندويشات. أنا حبيت فكرتي تكون نوعية، ليش ما أقدم المشروب مع كتاب أعزز ثقافة القراءة، اللي زمان صار لها متروكة، الكل التهى بالجوالات اليوم، صارت عندي الفكرة انه يجي ياخد عندي كتاب والأحلى من هيك الزبون صار يقرأ الكتاب يكمله تاني يوم. يعني حبيت انه أطّور الفكرة لعند ما وصلت لفكرة مكتبة قارئ البحر».
وأضاف «ثقافة القراءة بدأت تنمحي بصدد التطور اللي بيصير والتوك توك اللي بيوخد من وقتنا كثير ساعات. يعني لما ييجي عندي زبون عن جد يلمس الكتاب بيحس بالقيمة اللي ناس كتير قاعدة بتنشر كتابات وبتنشر علم وبتنشر شغلات أفضل من مليون مرجع على الانترنت. يعني الاشي بدل ما يكون واقعي بمرجع أنا أرجعله عن طريق الكتاب بدل ما يكون إلكتروني. اللي بيصير علينا اللي هي رسائل مسمومة، جوات الإلكتروني ممكن يتعدل لكن الكتاب عمره ما بيتعدل بيظل العلم زي ما هو ماسك قيمته ماسك أثره، بملمسه، كأنه كتاب حقيقي مش زي ما أكون أنا ماسك ع الإلكتروني».
وأعرب عن سعادته بتقبل رواد مقهاه للفكرة وتقديم بعضهم هدايا له في صورة كتب يزود بها ماكتبته، وقال «اليوم الفكرة بدا عليها تقبل بزيادة، يعني الحلو في الموضوع إنه الزبون بدأ يتقبل فكرة إنه يقرأ عندي كتاب مع مشروبه الخاص. أنا حبيت الروح اللي فيهم وحبيت كمان كتير دعم، صارت الناس تدعمني إنه بزيادة كمان يجيبوا معاهم هدايا كتب، فهذا الاشي رائع جدا، يعني أنا بتمنى الثقافة هذه تصير متواصلة عندي».
ويتردد سكان قطاع غزة المحاصر ببساطة على الكشك، المقهى والمكتبة، ويختارون كتابا ويستمتعون بقليل من القراءة الخفيفة مع إطلالة على الماء وهم يتناولون مشروبهم. ومن هؤلاء أريج عواد، التي قالت «إذا حدا بيمل من القراءة في مكان معين، مع وجود هذا الكشك في القراءة على شاطئ البحر أي حد راح يتشجع ع القراءة لأنه جوه البحر في الطبيعي ممتع، فمع القراءة حتزيد متعة وخصوصا انه بربط بين مشروبات ساخنة وكتاب وبحر حتزيد المتعة على شاطئ البحر».
وكذلك وسيم لبد، الذي قال «اليوم فيه عندك كتاب موجود، لما تلمس الكتاب زي هيك وتقلب بالصحف بتحس انه صار فيه عندك شيء جديد وبتكسر الروتين. خصوصا انه أحيانا أنت لما بدك معلومات عن أي شيء لما تيجي تخدها من الانترنت ما بتلاقيها كاملة، لكن من الكتاب بتلاقيها بالتفصيل. يعني خصوصا ريحة الكتاب كمان يعني بتذكرك في واقع الثقافة الموجود عندنا والمعلومات اللي أنت ممكن تكتسبها علشان تقوي قدراتك في الثقافة والمحاورة مع الاخرين. وهذا الشيء جديد، ومع منظر البحر كمان يعني الجو بيعطيك هيك انتعاش قراءة حلو».