محمد بن جمال: المشكلة في اول ارتباط في حياة الولد أو البنت، انه بيبقى في مرحلة المراهقة. في المرحلة دي، الولد بيبقى لسه خارج من مرحلة شنب اعدادي، والبنت بتبقى بدأت تاخد بالها ان حواجبها شبه يوسف داود ولازم تهتم بنفسها اكتر.
بيبتدي كل واحد فيهم يدور على الحب، كنوع من انواع تلبية الطبيعة البشرية في الانجذاب الي الجنس الاخر وبحثا عن الاستقرار. بيبتدي كل واحد فيهم يتعرف على اهتمامات الآخر وهنا بيحصل الصِدام.
الولد عموما مشكلته انه مابيركزش في التفاصيل، وده بيسببله مشكله في التعامل مع اول حب في حياته. على عكس البنت اللي بتركز في كل حاجة سواء كانت تافهه أو تافهه جداً. الولد حياته بسيطه زي الاميبا، لبسه بسيط، تفكيره إلى حد ما برضه بسيط.
البنت مختلفة، معقده إلى حد كبير. كل حاجة في حياتها ليها تفاصيل. اللبس ليه تفاصيل الكلام ليه تفاصيل الحب ليه تفاصيل.
في اول علاقه بيبقى الولد مش فاهم كل ده فهنا بيحصل الصدام. بتبدي البنت تزعل من الولد وتقفش عليه. بيبتدي هو يفكر هو زعلها في ايه. فيسألها فمترضاش تجاوبه، وتقوله «مااااااافيش»، هي مش بتقول كده رخامه بس هي مستغربه هو ازاي مش فاهم لواحده هي زعلت ليه !!. فللأسف هو بيحاول يستنبط لوحده هي زعلانه من ايه، ويبتدي يفكر في كل حاجة هو عملها عشان يحل اللغز ده. وفي الآخر طبعا مابيعرفش عشان بيبقى موضوع انك تعرف ايه اللي مزعلها اشبه بأنك نزلت الصين تدور على صيني شعره أكرت .
فيقولها غلب حماري قوليلي انتي، فتقوله لا انت لازم تعرف لوحدك. فيبتدي يقولها حاجات هو فاكر انها ممكن تكون زعلتها. فتقوله بص هما دول انا مكنتش فاكراهم، بس دول كمان زعلوني جداً… فبدل ما كانت حاجة واحده مزعلاها بقوا 5 حاجات، والموضوع يبتدي يكبر اكتر واكتر.
وعشان كده بيبتدوا يتكلموا اكتر عشان يعرف دماغها وتحكيله مشاكلها، وهمومها اللي هي مختلفه تمام عن همومه ومشاكله، بتحكيله عن خناقتها مع صاحبتها عشان وهي بتهزر معاها خبطتها بأزازه الميه على دماغها قدام الناس. وازاي مش ناويه تكلمها تاني عشان الحركه دي. فيفتكر هو صاحبه اللي كان بيهزر معاه بالقلم فخرمله عينه، وقاله بعديها معلش فقاله ولا يهمك يا معلم. بس ابقى تعالا زورني بعد العمليه اللي هعملها فيها.
هي لو اتصلت بيه ولقيته ويتينج يبقى بيكلم واحده. لو كلمته ولقيت التليفون مشغول يبقى برضه بيكلم واحده، وحاطط عشيقته التانيه ع الويتينغ عشان كده تليفونه مشغول، في حين ممكن يكون كان بيكلم سيد صاحبه. أو لو اتصلت بيه ومردش يبقى يا اما مات أو بيخونها ومركز ومش سامع الموبايل، مع انه كان نايم عشان كان مطبق. هي بتحب الورد، وهو بيحب بطاطس «فارم فريتس».
هي عاوزاه يبقى مهتم بيها 24 ساعة، وفي نفس الوقت يبقي شغال وناجح وغني، وهو مش عارف يبقي اي حاجة من الاربعه دول.
فيبتدوا يتخانقوا كتير، وهي تقوله انت مابقتش فاهمني. ده على اساس انه كان فاهمها في الاول يعني. وهو يقولها انتي اللي اوفر، ومابتفكريش غير في نفسك.وانا زهقت فتبتدي تتخنق منه وتسيبه أو يزهق منها ويخلع هو.
مدّون مصري
