محمد بن جمال : يمكن يكون اللي حصل في السؤال اللي سألته الصحافيه شيماء لليوناردو دي كابريو، وتعريفها لنفسها في البدايه انها مصرية وأول مصرية تغطي الأوسكار، حاجه كوميدية ومضحكة والعالم كله سف علينا واتريأ، بس لو بصينا للموضوع من زاوية تانيه فده هيعرفنا البلد بتاعتنا ماشيه ازاي.
المشكله الأولى ان احنا كمصريين من حقنا نفخر اننا احفاد الفراعنه واننا 7000 سنه حضارة، وان جدي خفرع الله يرحمه هو واخواته خوفو ومانكورع بنوا 3 اهرامات من عجائب الدنيا. من حقي افخر ان ثلث اثار العالم في الاقصر.. اي نعم هي بتتسرق كل يوم، وبتتباع واللي باقي دلوقتي هو عشر اثار العالم بس، بس من حقي افرح وافخر برده.
من حقي أفخر ان أجدادي عرفوا سر التحنيط وحنطوا جثثهم زمان، عشان تفضل جثثهم سليمه لحد النهارده والعالم كله يشوفها، اي نعم هما مفكروش فينا والموضوع ده ضرنا كتيير عشان لو كانوا دفنوا الجثث دي زي البني ادمين كان زمانها بقت بترول، وكنا بقينا دوله خليجية تعيش ع الذهب الاسود وأغنيا وكده وكبسه ولحمه بدل الفول والطعميه اللي عايشين فيهم دول، بس مش مهم دول اجدادنا برضه والحمد لله على كل حال.
المشكله بقى ان الناس والعالم مش بيبصولنا كده، يعني هو مش فارق معاه اجدادك عملوا ايه، ومابيبقوش منبهرين زي ما انت متخيل يع. يمكن هو مايعرفش اساسا عن مصر اذا كان عارفها يعني غير ان فيها PYRAMIDS «الإهرمات» وعادي يعني آه لو في يوم من الأيام زار آثار العالم كلها واتبقي الهرم هيبقي يجي يشوفه، لكن ما بيبقاش عايش يحوش ويحط القرش علي القرش عشان يجي يزور مصر.
احنا اللي للأسف واخدين ألم في نفسنا وبنبتدي نعرف نفسنا للناس على اننا ايجيبشانز وفاكرين ان العالم كله اول مايعرف معلومة زي دي هينبهر وكأننا احنا اللي بنأكل دول العالم كلها، واحنا اللي بنعالجها واحنا اللي بنصرف عليهم وبنديهم مصروف فلازم يحترمونا.
احنا للأسف مبنقدمش اي حاجه للعالم، واسمنا لا يذكر إلا في السف والتريقه، زي العالم ما اتريأ علينا على جهاز الكفته، واتريأ علينا على الوحش المصري، واتريأ على موضوع بيع السيسي على امازون، أو بيجيب سيرتنا في تجاوزات وقتل السياح الروس والسياح الميكسيكين، وتعذيب الطالب الايطالي حتى الموت لكن غير كده محدش يعرف عننا حاجة؟
لازم نبقي عارفين ان العالم بيحترم المفيد والقوي، مش الضعيف والتافه اللي عايش على ماضي… جده السابع ما شاركش فيه حتى.
العالم عاوزك كل يوم تقدم جديد عشان تبقى موجود. ويوم مايبقى ماعندكش جديد مش هيعرفك ولا هيهتم بيك.
ولو عاوز تفهم كلامي، قيس الموضوع على نفسك، تخيل نفسك قابلت واحد من باريس.. واول ماشافك بيقولك «انا فرنسي يعني برج ايفيل ومتحف اللوفر.. يعني الموناليزا اللي بتبصلك من اي حته دي يا معلم»، تخيل انت هتقوله ايه؟! ابسط حاجه هتقوله اهلا وسهلا اوانا مالي بالكلام ده ايه الانبهار اللي في كده يعني؟!
اما الشق التاني في السؤال «واط ابوت يور فيرست اوسكار»، فده بيعرفك ان البلد مش بلد كفاءات بل هي بلد واسطه، وياريت اللي بينجح فيها بالواسطه بيجتهد بعد كده. لا بالعكس بيفضل زي ماهو مش عارف حاجه عشان عارف ان طول ما الواسطه في ضهره مش مهم اي حاجة.
مدون مصري
